Tre nga 37 të akuzuarit e “Lagjes së Trimave”, Valdet Zekaj, Esat Kafexholli dhe Shefqet Kallaçi, janë ankuar për maltretime psiqike ndaj tyre nga autoritetet e burgjeve.
I akuzuari Zekaj tha se ia kanë hedhur poshtë rrobat, madje sipas tij ai ia kanë gjuajtur edhe Biblën dhe ia kanë shqyer librin për Nënë Terezën.
“Mi kanë gjuajtur rrobat poshtë, gjithashtu edhe Biblën, ndërkaq ma shqyn librin e Nënë Terezës”, tha Zekaj.
Kafexholli u ankua se autoritetet e burgut ia kanë marrë fletoret, të cilat fillimisht i kanë lejuar që t’i fut brenda.
“Vijnë në kontroll dhe m’i marrin fletoret. Fletoret janë sjell me paketë”, tha Kafexholli.
Ndaj këtij rasti, gjykatësja Verka Petrovska tha se do të konsultohet me autoritetet e burgut dhe nëse ka ndonjë lëshim të njëjtat do t’i kthehen.
Nga ana tjetër, sipas rrëfimit të Kallaçit, autoritetet e burgut ia kanë ndaluar që të mos e veshë një bluzë, pasi ajo përmban simbolin e Amerikës.
“Më thanë të mos e veshë bluzën pasi që përmbante shenjën e Amerikës”, tha Kallaçi.
Pas ankesave të të akuzuarve për maltretim psikik, në seancën e radhës vijoi dëgjimi i dëshmitarëve të propozuar nga pala mbrojtëse.
Siç lajmëroi paraprakisht avokati Naser Raufi, më së paku 50 dëshmitarë do të jenë të ftuar në seancat gjyqësore në vijim dhe në mesin e tyre do të ketë politikanë dhe ekspertë të fushave të ndryshme.
Në rastin “Kumanova – Lagja e Trimave” akuzohen 37 persona, për veprën “terrorizëm”, për ndodhitë e 9 dhe 10 majit të vitit 2015 në Kumanovë, ku një grup i armatosur u përlesh me forcat e sigurisë të Maqedonisë. Nga rasti në fjalë, u vranë 8 policë nga njësitet speciale dhe nga njësitet e veçanta të MPB-së dhe 4 të tjerë u plagosën. Ndërkaq, humbën jetën edhe 10 pjesëtarë të grupit të armatosur. Mensur Krasniqi – /tesheshi.com/
