Një dëshmitar në një gjykatë turke tha se gazetari saudit i vrarë Jamal Khashoggi mori kërcënime nga ish-këshilltari i Princit të Kurorës saudite Mohammed bin Salman.
Khashoggi u kërcënua nga Saud al-Kahtani, tha një dëshmitar në gjyqin e dytë ndaj 26 të dyshuarve në një gjykatë në Stamboll, i tha DPA-së Christian Mihr nga organizata e lirisë së medias Reporterët pa Kufij (RSF).
“Khashoggi foli për një bisedë telefonike me Kahtanin ndërsa jetonte në Uashington, duke thënë se ai e di se ku (Khashoggi) jeton me fëmijët e tij,” shkroi Drejtorja e Fushatës Ndërkombëtare të RSF, Rebeca Vincent në Twitter.
Një gjykatë turke shtoi gjashtë të paditur më shumë në listën e 20 zyrtarëve sauditë të cilët tashmë po gjykohen në mungesë sot, njoftoi media shtetërore.
Në seancën e sotme në Stamboll, i dyti në një gjyq që filloi katër muaj më parë, gjykata pranoi padinë e dytë, duke shtuar emrat e gjashtë zyrtarëve të tjerë sauditë, raporton Reuters.
Aktakuza e fundit akuzon nënkonsullin dhe atasheun për “vrasje me paramendim me qëllim monstruoz”. Katër të tjerë, gjithashtu shtetas sauditë, janë akuzuar për shkatërrim, fshehje ose mbjellje të paautorizuar të provave.
Khashoggi u vra në 2018 pasi ai hyri në konsullatën saudite në Stamboll për të marrë letrat e dasmës me të fejuarën e tij turke Hatice Cengiz që e priste përpara ndërtesës.
Një gjykatë saudite dënoi pesë persona me 20 vjet burg në fillim të shtatorit, duke zbutur dënimet e mëparshme me vdekje. /tesheshi.com/
