Një numër jo i vogël i kosovarëve që jetojnë jashtë vendit çdo ditë po ankohen se nuk po kanë mundësi të votojnë, pasi po hasin në probleme teknike në sistemin e aplikimit të ndërtuar nga Komisioni Qendror i Zgjedhjeve.
Por kryetarja e KQZ-së, Valdete Daka, thotë se kjo po ndodh për shkak të kohës së shkurtër që u është lënë në dispozicion për organizimin e zgjedhjeve.
“Ne nuk kemi faj që zgjedhjet janë shpallur për 30 ditë. Kjo është kostoja e zgjedhjeve të parakohshme, edhe këtë nuk mundem ta rregulloj as unë, e as KQZ-ja, me gjithë dëshirën,” ka deklaruar Daka, shkruan sot “Koha Ditore”.
Procesi i aplikimit për të votuar nga jashtë, sipas saj, ka qenë gjithmonë i njëjti, dhe nuk ka përbërë dallim për askënd, mirëpo ajo tregon se janë dy formacione politike që i kanë problematizuar votimet nga jashtë vendit.
“Procedurat kanë qenë të njëjta gjithmonë, e tash dikujt po i konvenon me bo problem, edhe po e bën. Lista Srpska dhe Vetëvendosja e kanë ngritur këtë problem,” argumenton zyrtarja e KQZ-së. /tesheshi.com/
