Përfaqësuesit e shoqatës së Transportit Urban, pas takimit me kryetarin e bashkisë, Erion Veliaj, në një deklaratë për mediat janë shprehur se ende nuk kanë dalë në një rezultat përfundimtar. Kjo shoqatë kërkon rritjen e çmimit të biletës, ndërkohë që kjo çështje është duke u diskutuar ditën e sotme në Këshillin e Bashkisë së Tiranës.
“Kanë plane shumë të bukura për biletat elektronike, për zgjerimin e linjave për të shkuar në periferi të qytetit. Këto janë gjëra që kërkojnë kohën e duhur. Mund të bëhet indeksim. Do presim masën e indeksimit dhe do të vendosim”,- tha njëri prej përfaqësuesve.
Ata shtojnë se “ka 8 vjet që vetëm flasim dhe futemi në borxhe me mendimin se do të rregullohet sot e nesër. Ende nuk po merr zgjidhje kjo punë. Të mos e politizojmë këtë problem jetik. Do të presim. Shpresojmë në këshillin bashkiak dhe do të kemi një qëndrim ditën e nesërme”,- thanë përfaqësuesit e shoqatës së transportit urban.
Duke kujtuar takimin e kreut të bashkisë së Tiranës me homologun e tij nga Prishtina dje, i bënë thirrje të shikojë se sa kushton bileta e transportit publik në Prishtinë.
“Ne nuk kemi më mundësinë të paguajmë rrogat e 2000 punonjësve. Të marrin masa për këto familje që presin të festojnë festat e fundvitit, si çdo familje tjetër”,- ishin fjalët e përfaqësuesve të shoqatës./tesheshi.com/
