Personeli i makinistëve të shoqatës aksionare të Hekurudhave të Maqedonisë, përmes grevës dy ditore bojkotuan punën e tyre. Ata theksuan se do të vazhdojnë me bllokimin e komunikacionit hekurudhor deri në përmbushjen e kërkesave të tyre. Ata edhe para tre muajve me ndërprerje dyjavore të komunikacionit hekurudhor kërkuan pagesë të rregullt të pagave vazhdojnë të kërkojnë pagesëne rregullt të rrogave, rritjen dhe barazimin e koeficientit të rrogave e të gjithë punonjësve si dhe kushte të tjera të punës.
Ndërkohë, ministri i Transportit dhe Lidhjeve, Goran Sugarevski tha se është angazhuar në zgjidhjen e këtij problemi, dhe se deri tani është arritur zgjidhje gjysmake. Ministri Sugarevski theksoi se për një pjesë të kërkesave kanë gjetur zgjidhje siç është rritje koeficientit të rrogave, ndërsa për pjesën tjetër do t’i zgjidhin në 2-3 javët e ardhshme.
“Të gjithë ato shtesa të cilat janë kërkuara nga ta, siç janë për punën gjatë natës, punën gjatë festave, punën gjatë të dielave, do të pranohen nga Hekurudha e Maqedonisë – transporti. Ne u morëm vesh me ta edhe për rritjen e koeficientit të rrogës nga 2.7 të jetë 2.85. Mendoj se është një zgjidhje shumë serioze, të cilën e kam dhënë edhe unë si ministër, por edhe udhëheqësja e Hekurudhave-Transporti”, theksoi Sugarevski.
Kjo grevë ka ngjallur reagime të ndërmarrjes publike Hekurudhat e Maqedonisë të Infrastrukturës. Drejtori Irfan Asani tha se si ndërmarrje, janë peng i një grupi të punëtorëve, meqë në trafikun hekurudhor nuk ekziston operator tjetër i cili bën transportin e njerëzve dhe mallrave dhe për këtë qëllim po përballen me humbje të larta financiare.
Sipas Asanit e tërë kjo ndodh pasi që nuk ka liberalizimi të tregut hekurudhor. Ai me kërkesa deri tek Qeveria tha se duhet punuar në drejtim që të liberalizohet tregu.
“Në vazhdimësi kemi bërë thirrje dhe kemi kërkuar për liberalizim të tregut. Ne si kompani e infrastrukturës do tu ofronim shërbime dy apo më shumë kompanive që do të kishin interes për të shfrytëzuar hekurudhën në Maqedoni dhe normalisht që ka shumë kompani që janë të interesuara sidomos për korridorin 10. Ne me mirësinë më të madhe presim një veprim të tillë nga Qeveria reformatore”, theksoiAsani.
E ndërkohë, Zv/kryeministri për çështje ekonomike, Koço Angjushev tha se është në plan të bëhet një gjë e tillë
“Ka ide në drejtim të asaj që të bëhet liberalizimi i transportit hekurudhor në Maqedoni. Kjo do të thotë se ekziston mundësia që në të ardhmen e gjithë infrastruktura hekurudhore të mbetet e shtetit, por njëkohësisht mund të ndodhë që të kemi më shumë kompani hekurudhore për transport, të cilat do të punojnë për t’u mundësuar konkurrencë më të madhe te ne, mirëpo kjo mund të ndodhë pa e dëmtuar interesin shtetëror”, tha zëvendës kryeministri për çështje ekonomike Goran Angjushev.
Sipas menaxhmentit të Hekurudhave të Maqedonisë-Infrastruktura problemet në sistemin hekurudhor u shfaqën me ndryshimet e ligjit për sistemin hekurudhor në nëntor të vitit 2011 me çka u ndalua liberalizimi i tregut. Kjo situatë e re e krijuar i mundësoi ndërmarrjes Hekurudhat e Maqedonisë- Transport pozitë të monopolit.
Përgatiti: Miradie Hasani – /tesheshi.com/
