Një prorpozim i bërë në seancën e sotme plenare nga deputeti i PDK-së, Nait Hasani që projektligji për Gjykatën Speciale të rikthehet në Kuvend për rishqyrtim pasi është kundër interesit të Kosovës, dhe mos hedhja në votim e kësaj kërkese, ka bërë që të shpërthejnë veteranët e UÇK-së të cilët qëndronin në vendin e mysafirëve në sallën plenare.
Duke parë se situata po dilte jashtë kontrollit pasi britmat e krerëve të veteranëve nuk ndaleshin, kryesuesi i seancës Xhavit Haliti i cili u mundua të qetësonte situatën duke bërë me dorë, u detyrua të shtyjë për të hënën vazhdimin e seancës.
Për këtë çështje para se të ndodhte ky incident u deklaruan grupet paralamentare të dy partive në pushtet.
Zenun Pajaziti nga PDK dhe Ismet Beqiri nga LDK siç duket të zënë në befasi me kërkesën që parashtroi kolegu i tyre Hasani, duke u thirrur në mungesën e partive opozitare që bojkotuan seancën, kërkuan që kjo çështje të debatohet në Kuvend pasi të jenë të pranishme të gjitha grupet paralamentare.
Këto deklarime aspak nuk iu pëlqyen drejtuesve të veteranëve që vëzhgonin nga lartë, andaj edhe filluan britmat.
Por tashmë padyshim se rishqyrtimi i Speciales është një problematikë e re për koalicionin qeverisës pas Demarkacionit me Malin e Zi, pasi veteranët kanë paralajmëruar bllokim të seancave nëse nuk shqyrtohet kërkesa e tyre.
Kështu kryeminsitri Mustafa përveç opozitarëve, kundër vetës zyrtarisht ka edhe veteranët e UÇK-së të cilët mund t’i shaktojnë kokëçarje edhe më të madhe nëse nuk ua plotëson kërkesat.
Hysni Gucat, kryetar i organizatës së veteranëve të UÇK-së ka bërë të qartë se veteranët nuk do lejojnë mbajtjen e seancave nëse në rend dite nuk futet kërkesa e tyre për rishqyrimin e Speciales.
“Arsyeja që ne kemi ardhë në Kuvend është lidhur me Gjykatën Speciale. Ne kërkojmë që të kthehet edhe njëherë për votim sepse të dy palët duhet të dënohen jo vetëm ne, pra edhe serbët”, ka deklaruar Gucati, për tesheshi. com.
Ai tha se nuk do të lënë të mbahet as një seancë në Kuvend pa u proceduar kjo çështje,dhe i ftoi të gjithë veteranët të mobilizohen dhe t’u bashkohen.
I pyetur se a frikësohen se mund të kenë fatin e opozitarëve dhe të nxjerren me dhunë nga Kuvendi nëse ndërprerjnë seancat, Gucati thotë se nuk beson se do vije gjendja deri në atë pikë.
“Nuk ma merr mendja që vjen puna deri aty. Policia nuk ndërhynë ndaj ish-ushtarëve të UÇK-së, sepse edhe ata edhe politikanët janë në këto pozita falë luftës së UÇK-së”, ka thënë Gucati, duke shtuar se veteranët do mbajnë mbledhje dhe do marrin qëndrim për hapat që do ndjekin më tej nëse nuk merret parasysh kërkesa e tyre.
Veteranët e UÇK-së vazhdojnë në qëndrojnë në sallën e Kuvendit përkundër vendimit të marrë për ndërprerjen e punimeve të seancës së rregullt, duke paralajmëruar qëndrimin edhe gjatë natës. /tesheshi.com/
