Pos atyre që janë kundër prishjes së godinës ekzistuese të TK-së, për të ndërtuar në vend të saj një të re, janë dhe e kundërta e tyre, artistëme emër, të cilët në një peticion i kërkojnë politikës, posaçërisht opozitës, që mos ta kompromentojë e pengojë të renë.
“Ju lutemi na mirëkuptoni, por durimi ynë ka sosur dhe nuk përballojmë dot më as edhe një kokërr loti krokodili në mexhelis për teatrin tonë! 50 vjet në atë ndërtesë-karantinë dhe të harruar nga politika na dalin e na teprojnë! Ne dhe brezat e aktorëve e regjisorëve pas nesh meritojmë një Teatër dinjitoz, që të na shërbejë jo vetëm neve, por edhe publikut teatërdashës, që nuk mund të vazhdojë të ndjekë edhe për 50 vjet të tjera teatrin politik me Teatrin Kombëtar, në vend të shfaqjeve tona”, thuhet në peticionin që mban firmat e disa emrave të njohur, me në krye të madhin Robert Ndrenika.
“Sa për ata pak kolegë dhe ‘kolegë’ që mendojnë se kanë marrë përsipër të mbrojnë godinën, shumicën e të cilëve nuk i njohim kush janë apo disa i kemi edhe miq (pavarësisht se nuk e gjejmë dot mbi çfarë karriere skenike kanë monopolizuar dhe devijuar totalisht kauzën tonë), ne kemi lutjen publike që të ndahen nga politikanët! Sepse Teatri Kombëtar nuk është ‘Astiri’ dhe skena kombëtare nuk është ‘tokë e xanun’!”, thuhet në mesazhin e tyre. /tesheshi.com/
