Një grup mbështetësish turq dhe armenë protestuan në Uashington, në Shtetet e Bashkuara.
Protestat vijnë pas një deklarate të Presidentit të SHBA Joe Biden në lidhje me ngjarjet e vitit 1915, raporton Anatolia.
Qytetarë me prejardhje turke u mblodhën para Ambasadës Turke në Uashington dhe shprehën pakënaqësi me fjalët e Biden. Ata që u mblodhën, të cilët shfaqën parulla dhe flamuj turq, dënuan deklaratën e Biden.
Protestuesit dënuan pretendimet armene në lidhje me ngjarjet e vitit 1915. Përkrahësit armenë u mblodhën gjithashtu në anën e kundërt.
Joe Biden të shtunën zyrtarisht pranoi ekzekutimin e armenëve në Perandorinë Osmane si gjenocid.
“Çdo vit në këtë ditë, ne kujtojmë jetën e atyre që vdiqën në gjenocidin e armenëve në epokën Osmane dhe zotohemi të parandalojmë mizori të tilla që të mos ndodhin më kurrë,” tha ai në një deklaratë të lëshuar nga Shtëpia e Bardhë.
Me këtë deklaratë, Biden u bë presidenti i parë amerikan që njohu zyrtarisht vrasjet e rreth 1.5 milion armenëve në Perandorinë Osmane – nga 1915 në 1917 – si një akt gjenocidi.
Ambasadori i SHBA në Ankara David Satterfield është thirrur në Ministrinë e Jashtme Turke për bisedime mbi deklaratat e Biden rreth ngjarjeve të 1915.
Një burim diplomatik i paemëruar tha se ambasadori amerikan u prit nga Zv.Ministri i Jashtëm turk Sader Onal dhe përcolli reagimin e Turqisë ndaj deklaratave të Biden.
Ambasadorit amerikan u tha se Turqia dënon dhe hedh poshtë plotësisht deklaratat e Biden, të cilat janë të papranueshme dhe nuk kanë asnjë bazë historike ose ligjore.
Ministria e Jashtme turke gjithashtu i tha ambasadorit Satterfield se deklaratat e Biden nuk kishin asnjë efekt nën ligjin ndërkombëtar dhe se ato kishin dëmtuar thellë popullin turk dhe kishin shkaktuar plagë në marrëdhëniet që do të ishin të vështira për t’u shëruar. /tesheshi.com/
