Kuvendi është përfshirë nga debatet në seancën e sotme plenare për shkak të pr/ligjit për pakicat kombëtare.
Kreu i PBDNJ-së, Vangjel Dule, i cili ka hyrë në Kuvend si deputet i PD-së, kërkoi që drafti të mos përfshihet në rendin e ditës, ndërsa kërkoi sqarime sepse ky pr/ligj paraqitet nga Ministria e Jashtme dhe jo nga ajo e Drejtësisë apo e Brendshme.
“Përse ky ligj mbrohet në komisione dhe paraqitet nga Ministria e Jashtme dhe jo nga e Drejtësisë apo ajo e Brendshme. Përse zgjodhët natyrën e ligjit kuadër për këtë draft për minoritetet në një kohë që kërkohej një ligj për implementimin? Në hartimin e këtij ligji a keni marrë si referencë ligjin e ndonjë vendi tjetër të rajonit me të njëjtat ngjashmëri për respektimin e të drejtave të minoritetit?”, tha Dule.
Kundrejt pyetjeve të kreut të PBDNJ-së ka reaguar ministri i Jashtëm, Ditmir Bushati, i cili ka sqaruar se drafti është përgatitur nga 4 Ministri, ndërsa institucioni që ai drejton është përgjegjës për raportimin.
“Në lidhje me pyetjen e parë se pse Ministria e Jashtme e ka prezantuar ligjin në komisione dhe në seancë, informacioni juaj është i pasaktë. Ky pr/ligj është miratuar në Këshillin e Ministrave. Ministria që unë drejtoj është institucioni përgjegjës për raportimin. Ju them që nga viti 2000 e deri me sot ka një ndërveprim bazuar në konventën kuadër dhe Shqipëria ka disa detyrime. Kemi një ligj kuadër në bazën e të drejtës kombëtare. Ne me këtë ligj krijojmë bazën e akteve nënligjore. Kemi marrë rastet nga rajoni, por është e vështirë, pasi praktika është e shumëllojshme. Ka vende që kanë një realitet multientik”, tha Bushati.
Por sipas Dules, kjo përfaqëson frymën e kërkesave të minoriteteve, jo me diskriminim pozitiv por si të barabartë, vetëm një vend me trajtim të barabartë të qytetarëve garanton koherencën sociale, element kyç për integrimin”.
Pas tij ka replikuar serish Bushati, duke ironizuar me Dulen, se nuk e ka lexuar raportin edhe pse ka mbaruar për anglisht. Bushati theksoi se “sot nuk ka më verifikim me shkumës te dera e shtëpisë”.
“Nëse do ishte kaq e thjeshtë, fqinjët tanë, që me të drejtë flasin për respektimin e pakicave do kishin aderuar në këtë konventë shumë më parë. Pse nuk merrni në referencë ligjin çek apo polak? Unë nuk hyj në diskutim për ngjashmëritë, përbërja etnike e Malit të Zi është e pakrahasueshme”, tha Bushati.
Por në një tjetër replikë Dule tha “dëgjova tentativën tuaj për të ushtruar ironinë provinciale, ashtu si edhe në dëgjesa, mos e tentoni jeni i dështuar. Folët për ftesa, dhe se nuk kam marrë pjesë në debate, asnjë ftesë nuk më keni bërë”. /tesheshi.com/
