Komiteti Teknik doli me një tjetër paketë masash privuese në aspektin social anti-COVID, ku, siç mund të vihet re, ngjan të jenë kursyer tubimet fetare ndërsa janë ndaluar qartësisht ato të llojeve të tjera, përfshirë dhe aktivitetet politike.
“Në mbledhjen e fundit të Komitetit Teknik i Ekspertëve, pasi kemi analizuar situatën dhe risqet, ecurinë e epidemisë në vend dhe përgjigjen e qytetarëve ndaj masave të ndërmarra, kemi vendosur:
1. Të ndalohen grumbullimet me më shumë se 10 persona në vende të hapura dhe të mbyllura
2. Të ndalohen mbledhjet partiake dhe tubimet
3. Të ndalohen konfrencat, ceremonitë e festave, ceremonitë martesore dhe organizimet përtej atyre familjare të ceremonive mortore, deri në një urdhër të dytë”, u kumtua drejtuesja e ISHP-së, Albana Fico.
Por, duke mbetur te ceremonitë fetare, edhe pse ato nuk janë potencuar literalisht, sipas asaj çfarë është vendosur, edhe atom und të konsiderohen të ndaluara sipas pikës 1, pasi është fjala për “tubime në vende të mbyllura me më shumë se 10 persona”.
“Sa i përket situatës epidemike, u tha se ajo ishte gjithsesi nën kontroll, paçka rasteve të shtuara të infeksioneve.
Ashtu siç kemi bërë me dije çdo ditë në raportimin ditor, situata mbetet e kontrolluar, por në një nivel risku të shtuar për arsye të rritjes së rasteve pozitive ditore, shprehur qartë me një rritje të incidencës 14 ditore në 243 raste për 100 mijë banorë.
Numri total i rasteve aktive ka pësuar rritje në 504 per 100 mijë banorë.
Numri i pacienteve në spitale ka pësuar rritje krahasuar një jave më parë.
Në tre spitalet covid janë shtruar 406 paciente. Aktualisht rreth 20-25% e kapaciteteve janë ende të lira në kater strukturat e dedikuara për trajtimin e rasteve, ndërkohë që skenaret e përfshirjes së spitaleve rajonale janë gati në momentin që do ketë ezaurim të katër spitaleve Covid.
Terapitë intensive kanë një numër të qendrueshëm të pacienteve në kujdes intensiv.
Përqindja e humbjes së jetëve në raport me numrin e të prekurve është 2,2%”, tha dr. Fico. /tesheshi.com/
