“Mirëmëngjes Marsejë, mirëmëngjes Francë”. Me këto fjalë, në frëngjisht, Papa Françesku nisi sot shërbimin madhështor në stadiumin Velodrome në Marsejë, para dhjetëra mijëra njerëzve, mes tyre edhe presidentit Emmanuel Macron.
Papa më parë pati një takim gjysmë ore me presidentin francez, i cili u fokusua kryesisht në situatën ndërkombëtare, kryesisht Ukrainën, Afrikën, Nagorno-Karabakun dhe madje edhe çështjet mjedisore, sipas Elysee.
Emmanuel Macron foli për emigracionin. Ndërsa kreu i Kishës Katolike Romake denoncoi “indiferencën” e zyrtarëve politikë evropianë ndaj emigrantëve, “Franca nuk ka asgjë për të cilën të turpërohet, ajo është një vend i mirëseardhjes dhe integrimit”, tha presidenca franceze.
Papa Françesku mbërriti në Stade Velodrome, shtëpia e futbollistëve të Olimpikut të Marsejës, pasi hipi në avenue Prado me makinën papale nën një diell të ndritshëm dhe u përshëndet ngrohtësisht nga turmat që valëvitnin flamujt francezë, të Marsejës dhe të Vatikanit, ndërsa disa thërrisnin “Rroftë Papa, mirë se erdhe në Marsejë!”
Pas mbërritjes së tij, një banderolë e madhe u shpalos nga tifozët e Olimpikut të Marsejës.
Mes të ftuarve ishte edhe presidentja e Bankës Qendrore Evropiane, Christine Lagarde.
Prania e Emmanuel Macron u kritikua nga të zgjedhurit e majtë në emër të respektimit të karakterit laik të shtetit, ndërsa disa zyrtarë të zgjedhur të ekstremit të djathtë preferuan të bojkotojnë shërbimin për shkak të fjalimit të Papës për emigrantët.
Për këtë funksion madhështor, ku rreth 60 mijë njerëz kishin mbushur tribunat, u vendos një aparat sigurie “tepër e pazakontë”, me mobilizimin e 6000 policëve dhe një mijë rojeve private të sigurisë. /tesheshi.com/
