Instituti Hidrometeorologjik i Kosovës ka paralajmëruar se pas reshjeve të shiut të cilat me intensitet të ulët, filluan gjatë mëngjesit të ditës së sotme dhe vazhduan me intensitet të lartë në mesditë, pritet të ndodhin vërshime në pjesë të ndryshme të vendit.
Sipas një deklarate nga IDK-së, sasia e reshjeve brenda 24 orëve në disa pjesë, pritet të arrin rreth 50 – 60 mm. (l/m2).
“Reshjet me interval dhe intensitet të ndryshuar do të vazhdojnë edhe gjatë ditës së nesërme 21/05/2016, duke arritur në total rreth 80 mm/48/h. Nga këto reshje niveli nëpër lumenj sidomos atyre me karakter malorë. pritet që të jetë më i vrullshëm dhe më i shpejt, ku si pasojë fillimisht do të ketë vërshime si dhe rrëshqitje të tokës me ndjeshmëria për zonat e prekura dhe më tepër të ekspozuara: shumë të lartë 17%, të lartë 58%, të moderuar 11%”, thuhet në njoftim.
Zonat me potencial të lartë të vërshimeve janë pjesa veriore e vendit, konkretisht rrjedha e lumit Ibri dhe Sitnica me degët e tyre, pastaj pjesa lindore e Kosovës, sidomos (Kriva Reka) me degët e saja, pjesa jugore, lumi Lepenci dhe Nerodimja.
“Po ashtu vërshime lokale pritet të ketë edhe në disa pjesë të Dukagjinit, sidomos pjesa veriperëndimore e sajë (Bistrica Pejës, Deçanit) me disa degë të tyre dhe pjesa jugore e Dukagjinit (Bistrica Prizrenit, Toplluha, Mirusha etj.Reshjet e shiut pritet të ndërpriten gjatë orëve të mbrëmjes së datës 22/05/2016”, përfundon deklarata.
