Këshilli i prindërve të shkollës “Emin Duraku”, në Prishtinë janë mbledhur për të ndaluar hyrjen e mësimdhënëses së historisë, A.M, pas dyshimeve se kjo e fundit ka abuzuar me fëmijët e madje edhe i ka kërcënuar me jetë.
Zijavere Krasniqi, kryetare e këshillit drejtues të kësaj shkolle, u ka prirë grupit të prindërve që janë të pakënaqur me mosreagimin e Drejtorisë Komunale të Arsimit në Prishtinë.
“Sot jemi mbledhur një pjesë e prindërve si shenjë pakënaqësie për DKA-në, faktikisht edhe për gjykatën që nuk po e merr vendimin e duhur, vendim të suspendimit të arsimtares të historisë. Ende nuk kemi marrë përgjigje prej DKA-së, po presim një vendim të duhur dhe të shpejtë. Në të njëjtën kohë, u bëj thirrje gjykatës të marrin me seriozitet shumë të madh këtë çështje se nuk është e lehtë”, ka thënë ajo.
Prindërit e filloristëve kanë thënë se mësimdhënësja, emri i së cilës nuk bëhet i ditur për shkaqe procedurale, kishte qenë një “dhunuese verbale”. /tesheshi.com/
