Shkrimtarit të madh shqiptar Ismail Kadare i është ndarë sot çmimi ndërkombëtar “Letërsia Shqipe”. Këtë çmim Kadare e pranoi nga ministri i Kulturës, Kujtim Shala. Pas marrjes së çmimit, Kadare tha se kjo është një ceremoni që çdo shkrimtar e dëshiron.
“Më besoni se ky çmim ka vlerë për mua. Jam i lumtur kur e mendoj që po e marr këtë çmim në bibliotekë, sepse këto të fundit janë ‘mbretëri e lexuesve’. Shkrimtarët jetojnë falë bibliotekave dhe falë lexuesve”, tha Kadare.
Ndërsa, drejtori i Bibliotekës Kombëtare të Kosovës, Fazli Gajraku tha se kjo është një ceremoni emocionuese, ndërsa shtoi se ka aq shkrimtarë të mëdhenj e libra të mëdhenj në këtë bibliotekë, por për lexuesin e Kosovës, Kadare është shkrimtar i zemrës.
“Kadare është autori lidhja me të cilin nuk është shkëputur kurrë”, tha ai.
Kurse, Ndue Ukaj, nga ministria e Kulturës pohoi se Kadare është autori më përfaqësues i letërsisë shqipe dhe se vepra e tij ka kapërcyer kufijtë.
“Me fuqinë e artit të tij letrar ka bërë që letërsia shqipe të hyjë dinjitetshëm në artin e letërsisë botërore, aty ky hyjnë vetëm titanët e mëdhenj të tillë si Ismail Kadare”, deklaroi Ukaj. /tesheshi.com/
