Policia e Kosovës parandaloi një sulm terrorist, pohoi ministri i Brendshëm Xhelal Sveçla.
Ai tha se në një automjet janë gjetur një sasi e konsiderueshme armësh – thika, eksploziv dhe municione me uniforma.
“Falë angazhimit intensiv të njësive të specializuara të Policisë së Kosovës dhe informacioneve të marra – të dhënave të inteligjencës, sot rreth 100 metra nga komuna e Zveçanit është identifikuar një veturë me targa të Beogradit, në të cilën ka pasur sasi të mëdha të armëve, mjeteve shpërthyese dhe municione. U zbuluan lloje të ndryshme, duke përfshirë thika, eksplozivë, armë automatike, një sasi e konsiderueshme municionesh, granata trullosëse, uniforma ushtarake dhe çanta.
Të gjitha këto mjete ishin të destinuara dhe shërbejnë për të kryer sulme terroriste ndaj qytetarëve dhe institucioneve të Republikës së Kosovës. Kjo është një tjetër dëshmi se Serbia synon të destabilizojë vendin tonë përmes këtyre grupeve dhe organizatave.
Policia e Kosovës, së bashku me të gjitha agjencitë tjera të sigurisë, vazhdon përkushtimin e saj për parandalimin e çdo akti të mundshëm që ka për qëllim cenimin e sigurisë së vendit tonë.
Ky rast konfirmon informacionin e marrë nga institucionet e sigurisë së Republikës së Kosovës se gjatë javëve të fundit nga territori i Serbisë në Kosovë janë futur vetura dhe automjete të tjera me armë ushtarake”, thuhet në deklaratë. /tesheshi.com/
