Nga Musa Mustafa
E ndërsa Prishtina zjen për shkak të zgjedhjes së Presidentit, veriu i Kosovës ka rënë pothujse të dorë të serbëve, të cilët bëhen gati për të pritur kryeministrin Vuçiq të dielën.
Pjesëtarë njësisë speciale të xhandarmërisë serbe dhe pjesëtarë të shërbimit sekret serb, BIA, të enjten në orët e vona janë futur në Kosovë me makinat e tyre përmes rrugëve ilegale – kanë njoftuar burime të portalit tesheshi.com.
Sipas burimit, këto forca të sigurisë së Serbisë tani kanë marr kontrollin në veriun e Mitrovicë duke bërë sigurimin e çdo pjese të rrugës kah do të kalojë të dilelën eskorta e kryeministrit Vuçiq”.
Bëhet me dije se se pjesëtarët e xhandarmërisë serbe janë duke shfrytëzuar dy makina xhip “Mitsubishi Pajero”, një ngjyrë hiri metalike e tjetri me ngjyrë të zezë pa targa, ndërsa jesëtarët e BIA-së të gjithë kanë në shfrytëzim makina “Skoda” me targa të Beogradit.
Të gjithë këta janë të vendosur në konviktin nr-5 të studentëve të universitetit serb të Prishtinës me seli në veri të Mitrovicës – ka thënë burimi dhe ka shtuar se të gjithë këta person, mbi 30 sish, kanë hyrë në Kosovë rreth orës 20:00 nëpërmes rrugën ilegale nëpër fshatin Tresavë të Komunës së Leposaviqit.
Këto forca të sigurisë, gjatë orëve të natës kanë vëzhguar disa lokale në veri, ndërsa mbi 10 qytetarë serbë që njihen si problematik dhe jo luajal ndaj institucioneve të Serbisë, i kanë urdhëruar që të dielën të mos dalin nga shtëpia se në të kundërtën ata do të arrestohen.
Në anën tjetër, kryetari i komunës paralele serbe të veriut të Mitrovicës, Aleksandar Spiriq, ka urdhërua pjesëtarët e Mbrojtjes Civile (Civilna Zastitës) që gjatë natës të zbukurojnë qytetin duke vendosur pankartat me fotografi të kryeministrit Vuçiq dhe flamuj shtetërorë serbë.
Civilna Zastita ka zbukuruar sidomos rrugën kryesore të veriut të Mitrovicës, ‘Kral Petri” të cilën e kanë mbushur përplot me material propagandistik të Vuçiqit, fotot e të së cilës rrugë i ka siguruar portali tesheshi.com.
Zyrtarë të policisë së Kosovës nga rajoni i veriut i kanë thënë portalit tesheshi.com se Policia e Kosovës nuk ka informacione se në Kosovë, përkatësisht në veriun e saj kanë hyrë pjesëtarë të xhandarmërisë serbë dhe të BIA-s.
Veriu i Mitrovicës dhe Kosovës është bërë gati për të pritur kryeministrin e Serbisë Aleksandar Vuçiq i cili të dielën do të qëndrojë në veri të Mitrovicës në kuadër të fushatës paraelektorale si dhe do të bëjë përurimin e disa institucioneve që janë financuar nga qeveria e Serbisë. /tesheshi.com/
