Komuna e Prishtinës, pas paralajmërimeve se nga fundjava vendi do të shoqërohet nga moti me borë dhe acar, ka njoftuar se tashmë ka bërë të gjitha përgatitjet e nevojshme për mirëmbajtjen e rrugëve të qytetit.
Përmes një njoftimi, ka kërkuar nga ngasësit e makinave që të jenë të pajisur me mjetet dimërore, siç thotë ligji.
“Në kushte atmosferike ekstreme vështirësohet pastrimi i rrugëve nga bora dhe akulli, andaj kërkojmë nga ngasësit e makinave që t’i kenë të gjitha pajisjet dimërore siç janë të obliguar me ligj dhe mos të dalin të papërgatitur në rrugë, sepse ashtu po e bllokojnë rrugën dhe po shkaktojnë kaos në qytet”, thuhet në njoftim.
Komuna ka apeluar te pronarët e dyqaneve që ta pastrojnë borën në trotuar, para dyqaneve të tyre, siç parashihet në rregullore, në mënyrë që së bashku ta bëjnë të mundur qarkullimin sa më të lehtë të njerëzve.
/tesheshi.com/
