Mijëra protestues të grupmoshave të ndryshme me gra, pleq e të rinj u mblodhën paraditën e së hënës në Prishtinë, për të kërkuar drejtësi për aktivistin e Lëvizjes Vetëvendosje, Astrit Deharit. Ai ndërroi jetë në mënyrë misterioze në burgun Prizrenit, më 5 nëntor.
Qytetarët e nisën tubimin e tyre që nga sheshi “Zahir Pajaziti”, për të vazhduar më pas drejt Teatrit Kombëtar. Ata mbanin në duar pankarta me mbishkrimet “Poshtë qeveria”, “9 ditë nga vdekja askush nuk dha përgjegjësi”, “Kadri Veseli ishalla nuk e vrani vetën”,”Rezistenca vetëm sa do të rritet”, “Liri, liri për aktivistët” etj., si dhe brohorisnin “Astriti”, “Drejtësi për Astritin”, “Pa drejtësi nuk ka qenë qetësi”.
Me të mbërritur para Teatrit Kombëtarë, fjalën e mori përfaqësuesja e shoqërisë civile, Besa Luzha, e cila tha se protestuesit kërkojnë hetime të paanshme e të pavarura rreth shkaqeve që sollën vdekjen e Astritit.
Ajo tha se është pafalshme që në burg të humbë jetë jetën tragjikisht një djalë i ri i Kosovës, ndërsa kërkoi që zinxhiri komandues nga gardianët, drejtori i burgut, drejtori i policisë dhe ministrja e Drejtësisë të japin përgjegjësi.
“Ministria e Drejtësisë, Dhurata Hoxha, duhet të mbajë përgjegjësi për Deharin, ose të jap dorëheqjen nëse nuk mund ta kryej punën e saj”, u shpreh Luzha.
Më pas, fjalën e mori avokati i familjes Dehari, Tomë Gashi. Ai tregoi edhe një herë mbi versionin e dhënë nga xhirimet e kamerave të sigurisë në burg, me pamjen që ai ka parë gjatë obduksionit.
“Astrit Dehari nuk e ka pasur asnjë plagë në fytyrë. Xhirimet kanë treguar një peshqir krejtësisht të mbuluar me gjak me qëllim që t’i jepet një version tjetër vdekjes së tij”, ka thënë Gashi.
Ai ka perifrazoi edhe njëherë deklaratat e drejtorit të Policisë së Prizrenit, Nexhmi Krasniqi, i cili ka thënë se “Astrit Dehari ka vdekur si shkak i përdorimit të shumtë të ilaceve”, duke shtuar se kjo gjë shton dyshimet për mënyrën e vdekjes së të riut, pasi asnjë medikament nuk është gjetur në qelinë e të ndjerit.
Avokati ngriti ceshtjen se pse asnjë nga gardianët e burgut nuk kishin ndërruar turnin.
Në protestë i pranishëm ishte dhe Avni Dehari, babai i Astritit i shoqëruar nga kryetari i Vetëvendosje-s, Visar Ymeri, dhe Xhelal Sveqla ish drejtor i Inspeksionit në Komunën e Prishtinës.
Qytetarët paralajmëruan se do të vijojnë protestat, deri sa drejtësia të zbardhë motivet e vdekjes së Astrit Deharit.
Nga Blendi Gashi/tesheshi.com
