Qeveria e Kosovës nuk do të heqë dorë nga zbatimi i reciprocitetit me Serbinë për targa dhe letërnjoftime. Këtë e ka konfirmuar ministri i Punëve të Brendshme Xhelal Svelça.
Svelça tha në intervistë se ka indikacione se incidentet në Veri mund të përsëriten edhe para 1 shtatorit “nga një faktor kriminal i mbështetur nga Serbia, nën ndikimin e Rusisë”.
Pavarësisht situatës, ai theksoi se nuk ka mundësi për shtyrje të re të afatit, sepse institucionet e Kosovës janë të vendosura që t’i shtrijnë kompetencat e tyre në të gjithë vendin, pasi kanë mbështetjen e faktorit ndërkombëtar dhe KFOR-it.
Sa i përket situatës politike në Kosovë, Svelça shprehu besimin se qeveria e Kurtit do të vazhdojë mandatin e saj sepse ka mbështetjen e popullit, përkundër kundërshtimeve të opozitës.
Ai theksoi se institucionet e Kosovës janë të gatshme të përballen me çdo lloj situate që mund të krijohet.
“Shpresojmë që të mos ketë tension, besojmë se nuk ka arsye. Por ka edhe indikacione se mund të ndodhin. Ne jemi të gatshëm të përballojmë çdo lloj situate, institucionet tona janë të pjekura, të forta dhe të gatshme për të përballuar çdo detyrë ligjore që marrin. Por kemi edhe mbështetjen edhetë faktorit ndërkombëtar”.
I pyetur se nga e ka marrë këtë informacion, Svelça u përgjigj “nga terreni, por edhe nga bashkësia ndërkombëtare”.
Svelça njoftoi se do të zhvillojë fushata sensibilizuese në Veri për të bindur qytetarët serbë që të respektojnë vendimin e qeverisë për targat dhe lejekalimet në kufi. /tesheshi.com/
