Zyrtarët serbë dhe kosovarë kanë pranuar thirrjen e Shtëpisë së Bardhë për dialog dhe do të udhëtojnë në Uashington në 27 qershor, në përpjekje për të gjetur një kompromis drejt një marrëveshjeje historike, por që ka në hije dhe një diskutim të mundshëm mbi lëvizje kufijsh. E kjo, me vetë ndërmjetësimin e Presidentit Donald Trump.
Të paktën kështu komentohet nga disa media rajonale ky zhvillim i pritshëm.
Informacioni në lidhje me takimin u njoftua në rrjetet sociale nga i dërguari special i presidentit amerikan për dialogun midis Beogradit dhe Prishtinës, Richard Grenell. Këshilltari për sigurinë kombëtare Trump, Robert O’Brien, pretendon se ftesa u vendos pas anullimit të taksës dhe reciprocitetit nga ana e qeverisë së re të Prishtinës, si masë ndaj Beogradit. Ndodhi kjo me kryeministrin e ri Avdullah Hoti, i cili zuri vendin e Albin Kurtit të rrëzuar me mocion mosbesimi.
Duke pasur parasysh që emri i Grenell është i lidhur me idenë e korrigjimit të kufijve, mediat botërore tashmë po spekulojnë se një propozim për ndryshimin e territorit nuk mund të mos gjendet në tryezë. Në këtë rast, Serbia do të merrte veriun e Kosovës, dhe Kosovës do t’i jepej Lugina e Preshevës, ku jeton popullata me shumicë shqiptare.
Sipas Shtëpisë së Bardhë, Shtetet e Bashkuara po planifikojnë një taktikë të tipit “shkop dhe karotë”, ku kjo e fundit do jetë një fond prej 200 milion dollarësh kredi të favorshme për zhvillimin ekonomik, ndërsa “shkopi ” do të jetë një tërheqje e mundshme e forcave ushtarake amerikane nga rajoni.
Presidenti serb Aleksandar Vuçiç foli me homologun rus Vladimir Putin në fillim të kësaj jave, dhe një deklaratë nga zyra e tij sugjeron që ideja e “korrigjimit të kufijve” tingëllon e pranueshme për Moskën, por vetëm nëse miratohet nga Këshilli i Sigurimit i KB. /tesheshi.com/
