Ministri i Brendshëm i Kosovës, Xhelal Sveçla, tha se do të kërkojë që “Mbrojtja Civile” dhe “Brigada e Veriut” të shpallen terroriste dhe se lufta kundër këtyre organizatave do të jetë edhe më efektive.
Në kampin e Policisë së Kosovës “Belvedere” në Mitrovicën e Jugut, në një konferencë të jashtëzakonshme për media, Sveçla po ashtu tha se “që nga Kosova e pasluftës, Kosova ka vazhduar të përballet me agresionin e Beogradit zyrtar”.
“Dora e zgjatur e tyre ka intensifikuar së fundmi sulmet terroriste ndaj Policisë së Kosovës, veturave, stacioneve të tyre, sulmeve ndaj pjesëtarëve të KFOR-it dhe EULEX-it, gazetarëve dhe qytetarëve të vendit”, tha ai.
Një ditë më parë policia e Kosovës njoftoi se rreth 100 metra larg komunës së Zveçanit kishte identifikuar një veturë me targa të Beogradit plot armatim brenda.
“Kjo veturë është identifikuar si pronë e një ndërmarrje publike shtetërore të Serbisë”, tha ai.
Sveçla ka ngritur akuza edhe ndaj njërit prej drejtuesve të Policisë së Kosovës për rajonin verior.
“Ka tabela me simbolet e formacionit ilegal kriminal dhe terrorist ‘Brigada Veriore’, shenja të njësive ruse, pajisje radio të ngjashme me atë të konfiskuar në zyrën e Aleksandar Filipoviçit në komunën e Leposaviqit”, tha Sveçla.
“E gjithë kjo është një tjetër dëshmi se presidenti i Serbisë, Aleksandar Vuçiç, synon të destabilizojë vendin tonë përmes grupeve dhe organizatave të tilla. Ky rast konfirmon informacionin e marrë se automjete dhe armë të tjera ushtarake kanë hyrë nga territori i Serbisë gjatë javëve të fundit”, tha ministri. /tesheshi.com/
