Inaugurohet eko-parku i parë në Prishtinë, projekt ky i realizuar në përpjekjet për të ulur ndotjen e ajrit dhe për të përmirësuar cilësinë e jetës së qytetarëve.
Ky eko-park është tërësisht unik në vend. Pas ceremonisë së kurorëzimit, të sapo-martuarit në Komunën e Prishtinës do të inkurajohen të mbjellin një pemë në këtë zonë. Parku ka kapacitet për mbjelljen e 120 pemëve, duke krijuar një oaz të vogël, në një nga kryqëzimet më të ngarkuara të qytetit me kapacitet për të absorbuar rreth 200,000 kg CO2 për 10 vitet e ardhshme.
“Normat e larta të ndotjes së ajrit në qytet janë çështje shqetësuese për mirëqenien e komunitetit tonë. Prandaj, duke udhëhequr këtë nismë në vend dhe rajon, kemi për synim të jemi shembull jo vetëm për komunat dhe vendet e tjera, por për qytetarët drejtpërdrejt – ruajtja e mjedisit është përgjegjësi e të gjithë neve. Inkurajoj qytetarët të kujdesen për parkun, në mënyrë që t’i shërbejë komunitetit edhe për shumë vite duke ndikuar në uljen e ndotjes së ajrit”, tha Nerita Tira, drejtor i “Coca-Cola HBC Kosova”.
Ndërsa ambasadori amerikan, Greig Delawie, tha se shumë kompani amerikane mbështesin aktivitetet e të rinjve që kanë të bëjnë me mjedisin.
“Inkurajoj edhe bizneset në Kosovë që të mbështesin këto aktivitete, dhe pres të shoh frutin në ditët në vijim”, tha Delawie.
Kryetari Shpend Ahmeti theksoi rëndësinë e lartë të këtij eko-parku që ka për shoqërinë. /tesheshi.com/
