Mallkime dhe lutje për vajtje në ferr i janë adresuar kryeministrit Rama, nga banorë të Jalës që u ballafaquan këtë paradite me ruspat e IKMT-së. Prishja e disa ndërtimeve pa leje është përkthyer nga pronarët e tyre deri dhe si shkelje mbi gjakun e Krishtit.
“Ti nuk je Jezu Krisht Edi Rama, je ISIS me dashje jo pa dashje. Në emër të Perëndisë të mallkoj, të lidh, të shkatërroj. Unë jam e fortë sepse kam frymën e Perëndisë. Ne jemi Jezu Krishta dhe t’i do vesh në ferr. Ti ke shkelur mbi gjakun e Krishtit”, ishte fjalët e ashpra të një gruaje, mbushur me “mllef teologjik” karshi të parit të qeverisë, nip i atyre anëve.
Nga ana tjetër, nga IKMT është bërë një sqarim i ftohtë zyrtar.
“Aksioni i IKMT ka nisur pasi më parë për këto objekte është bërë proçesi i skualifikimit nga ana e institucionit të ALUIZNI-it duke u trajtuar si ndërtim i paligjshëm. Pavarësisht kësaj, sërish IKMT ka bërë njoftimet sipas ligjit. IKMT ka qenë e mbështëtur edhe nga policia e shtetit në këtë aksion”.
Por banorët kënë thënë se gjithçka ishte mbi pronën e tyre.
“Kam dokumentet e pronës, të cilën e kemi me ligjin 7501. Ne jemi në pronën tonë dhe nuk jemi futur absolutisht asnjë metër brenda kufirit. E vetmja arsye që po na i prishin ndërtimet është se ata pretendojnë se në jemi futur brenda territorit të SHPU në Jalë, Shtëpia e Pushimit të Ushtarakëve. Ne e vërtetojmë që nuk është kështu me dokumente. Për këtë kemi bërë edhe ankimim në Gjykatën e Vlorës. Ne jemi në proces gjyqësor dhe e kemi ankimuar brenda afateve kohore. Sot kanë ardhur pa njoftim paraprak dhe pa një vendim”, tha njëri nga “viktimat” e prishjeve. /tesheshi.com/
