Gaz lotsjellës e ujë me presion ka përdorur policia franceze të hënën ndaj emigrantëve e aktivistëve në Kale (Calais) që po protestonin për prishjen e barakave në të ashtuquajturën “xhungël”.
Përplasja nisi ndërsa punëtorë të mbrojtur nga policia kërkuan të fillojnë prishjen e strehimeve të emigrantëve. Në ndihmë të punëtorëve ishin dhe dy buldozerë, por që nuk u përdorën.
Shkatërrimi i pjesës jugore të kampit të emigrantëve, apo, ndryshe, “xhunglës”, u ndërmor pas hedhjes poshtë javën e shkuar të një peticioni për ta ndaluar atë.
Emigrantë dhe aktivistë të grupit britanik “Jo kufij” u vunë flakën disa strehimeve. Nga banorët e kampit pati gjithashtu dhe gurë të hedhur në rrugë e goditje të makinave që kalonin në të.
Sipas zyrtarëve lokalë, policia arrestoi tre anëtarë të grupit aktivist “Jo kufij” dhe një emigrant.
Autoritetet vendore patën premtuar më herët se askush nuk do të evakuohej me forcë. Ata deklarojnë se në kamp jetojnë 3.700 njerëz, e se nga prishja e strehimeve do të preken 800 deri në 1000 banues në to.
Por organizatat bamirëse pretendojnë se, sipas një numërimi të kryer së fundi prej tyre, vetëm në pjesën jugore të kampit ka 3.450 persona, duke përfshirë 300 fëmijë të pashoqëruar.
Mijëra njerëz që i kanë ikur luftës dhe varfërisë, që prej Afganistanit në Siri, janë mbledhur vitin e shkuar në Kale me shpresën për të kaluar që andej në Britani, por vendqëndrimi i tyre është kthyer në një problem sigurie për organet policore franceze. /tesheshi.com/
