Dje është prishur shtëpia e Prek Calit, një prej figurave antikomuniste më të njohura në vend.
Prishja e shtëpisë solli reagimin e opozitës, e cila akuzoi kryeministrin Edi Rama se nuk mund të durojë simbolet antikomuniste, kur në qeveri ka përfshitë pinjollët e ish-bllokut dhe në krye të Kuvendit zgjodhi ministrin e Brendshëm të diktaturës.
Por në një reagim të ashpër Tom Doshi, i afërt me Prek Calin, thotë se shtëpia do tërindërtohet siç ka qenë, 3-katëshe. Madje Doshi thotë se ajo do të ndërtohet brenda vitit të Skënderbeut.
Rindërtimi i shtëpisë u bë kohët e fundit me kontributin e shqiptarëve të Amerikës, por është konsideruar si ndërtim pa leje, çka çoi dje në ndërhyrjen e fadromave.
“Janë prishur punimet që kishin filluar për rindërtimin e shtëpisë së Prek Calit në Vermosh. Në veçanti më vjen keq për mundin e komunitetit shqiptar të Amerikës që kontribuoi financiarisht për punimet që ishin bërë deri dje dhe i kerkoj falje në emën të të gjithë shqiptarëve.
Pikërisht, ata që do të duhej ta kishin mbrojtur shtëpinë e prijësit dhe të mbrojtësit të tokave shqiptare, heroit Prek Cali, e rrafshuan edhe atë që kishte mbetur në këmbë.
Ky akt barbar turpëron ata që i kanë marrë votat malësorëve dhe tregon se urrejtja ndaj qëndrestarëve antikomunista si Prek Cali nuk ka fund.
Unë i premtoj mbështetësve dhe bashkëqytetarëve të mi, se shtëpia e Prek Calit do të ndërtohet ashtu siç ka qenë dikur, kurrkush nuk mund ta mposhtë kujtimin e atij burri të kombit. Unë vetë si kushëri i tij, si deputet dhe si qytetar, ju jap fjalën që shtëpia e Prek Calit do të ndërtohet trekatëshe për Vitin e Skënderbeut”, shkruan Tom Doshi. /tesheshi.com/
