Është prishur marrëveshja në mes krerëve të politikës shqiptare për votimin e reformës për drejtësi, pas ndërmjetësimit frenetic të ndërkombëtarëve.
Në orët e vona të së mërkurës, negociatorët e PD-së dhe LSI-së deklaruan se janë marrë vesh me negociatorin e PS-së që formula e vettingut të zbatohet edhe në zgjedhjen e këshillit të lartë gjyqësor dhe këshillit të lartë të prokurorisë.
Kanë reaguar menjëherë ambasada e SHBA-së në Tiranë dhe ajo e BE-së që e kanë konsideruar Bashën një shkelës të marëveshjes dhe kanë kërkuar votimin e draftit në Kuvend.
Kryetari i Komisionit të Reformës në Drejtësi, Fatmir Xhafa, deklaroi se e gjitha kjo është një farsë pasi PD-ja ka ngritur vetëm një çështje e cila është pjesë e propozimit hibrid të zonjës Nuland.
Por kreu i PD-së, Lulzim Basha, në një konferencë shtypi, ka ngritur tonet dhe u është përgjigjur ashpër ndërkombëtarëve duke akuzuar PS-në se po shkel marrëveshjen.
Kreu i PD tha se ka pasur një marrëveshje prej kohësh për të katër institucionet që të aplikohet e njëjta formulë.
Basha theksoi se nuk ka pasur asnjë kusht të ri nga PD-ja. “Xhafaj pranoi se drafti zyrtar i PS nuk përfshin as rekomandimet Nuland as rekomandimet Hahn. PD kurrë nuk e ka pranuar këtë draft, as nuk e ka parë. Pjesa e KLGJ KLP është pjesa e vetme që ne kemi cilësuar si pjesa e votës së trafikueshme”, tha Kreu i PD.
Lulzim Basha theksoi se për reformën në drejtësi ka një marrëveshje dhe bëri thirrje për ta votuar atë sot në Parlament.
“Ne kemi një marrëveshje dhe jemi gati ta miratojmë sot në Kuvend. Mbi tavolinë ka një marrëveshje dhe Edi Rama duhet ta miratojë atë. PD do të jetë në Parlament për të miratuar këtë marrëveshje”, shtoi Basha.
/tesheshi.com/
