Ish-presidenti Thaçi u vizitua këtë të premte në Hagë nga prindërit e tij.
Dy të moshuarit dhe anëtarë të tjerë të familjes Thaçi hynë në qendrën e paraburgimit, ku ndodhet i biri Thaçi dhe ish-komandantët e tjerë të UÇK-së.
Takimi i Thaçit me prindërit e tij ka zgjatur rreth 6 orë. Për herë të fundit, ish-kreu i shtetit të Kosovës ishte takuar me ta në nëntor të vitit 2020.
Kujtojmë se Thaçi u vizitua së fundi dhe nga kryeministri Rama e nga kryekuvendari Konjufca.
Më 10 maj të vitit 2022, Thaçi u paraqit në seancën e radhës në Gjykatën Speciale në Hagë, pasi më 29 prill 2022, Zyra e Prokurorit Special ka dorëzuar aktakuzën e ndryshuar ndaj tij.
Që nga nëntori i vitit 2020, Hashim Thaçi, Kadri Veseli, Rexhep Selimi dhe Jakup Krasniqi gjenden në paraburgim në Hagë. Ata janë deklaruar të pafajshëm për akuzat që rëndojnë ndaj tyre.
Në dokumentin e dorëzuar nga organi i akuzës në Gjykatën e Hagës, ata akuzohen se u kanë hequr lirinë të paktën 12 personave në periudhën 4 korrik 1998-29 prill 1999.
Akuza ndaj tyre për krime lufte shtrihet midis marsit të vitit 1998 dhe shtatorit të vitit 1999. /tesheshi.com/
