Kisha Katolike Franceze u bëri thirrje prokurorëve të premten, më 17 janar, të hapin një hetim mbi akuzat për abuzim seksual kundër priftit të ndjerë francez Abbe Pierre, i cili nga ana tjetër ishte një shërbëtor për të varfërit dhe të pastrehët, për fshehje të mundshme të krimeve të tilla, raporton Reuters.
Henri-Antoine Groues, i njohur më mirë si Abbe Pierre, ishte një prift katolik romak që hoqi dorë nga pasuria e tij për t’iu përkushtuar për të ndihmuar të pastrehët dhe të varfërit, dhe ishte për një kohë një nga figurat më të respektuara në Francë. Ai u nda nga jeta në vitin 2007 në moshën 94-vjeçare.
Kërkesa e Kishës erdhi pasi dy organizata humanitare të themeluara nga Abbe Pierre, Emmaus International dhe Fondacioni Abbe Pierre, publikuan një raport në korrik të vitit të kaluar me dëshmitë e shtatë grave që akuzuan priftin e ndjerë për abuzim seksual ose ngacmim. Organizatat thanë se i besonin pretendimet dhe mbështesnin viktimat e supozuara.
Në një deklaratë të lëshuar të premten, më 17 janar, kryepeshkopi i Francës, Eric de Moulins-Beaufort, tha se po i kërkonte zyrës së prokurorit të Parisit të hapte një hetim për “mos raportimin e përdhunimit dhe abuzimit seksual ndaj njerëzve të cenueshëm dhe të miturve”.
“Vetëm sistemi gjyqësor posedon mjetet e nevojshme hetimore për të përcaktuar të vërtetën e plotë rreth fshehjeve të mundshme në favor të Abbe Pierre”, thuhet në deklaratë.
Që nga momenti që akuzat e para u bënë publike, organizatat humanitare hapën një linjë telefonike për të mbledhur dëshmi të reja.
Në shtator, ata publikuan një raport të dytë me 17 viktima të reja të supozuara, dhe të hënën, një të tretë, duke e çuar numrin e përgjithshëm të akuzave kundër Abbe Pierre në 33. /tesheshi.com/
