Nata në veri të Kosovës ka kaluar e qetë, pa incidente, me prani të shtuar të policëve në të katër komunat, si dhe në skajet e pjesës veriore të Mitrovicës, në vijat demarkuese ndërmjet pjesës jugore dhe veriore të qytetit.
Qytetarët janë ende para objekteve komunale në Leposaviq, Zveçan dhe Zubin Potok, duke kërkuar që pjesëtarët e policisë speciale të largohen nga aty ku i sollën kryetarët shqiptarë.
Nga vendkalimi kufitar ende nuk lejohen të hyjnë kamionë me mallra me origjinë nga Serbia, si dhe kamionë me targa serbe, qofshin ato bosh apo që transportojnë mallra me origjinë të huaj.
Kamionët me targa serbe nuk lejohen të hyjnë as nga Shqipëria, edhe pse transportojnë mallra shqiptare, qoftë në Serbi, qoftë në Kosovë.
Policia e Kosovës ka njoftuar të premten se ka arrestuar një person të dyshuar për sulmin ndaj gazetarëve të disa mediave në Leposaviq më 29 maj.
Ata shtuan se i arrestuari është dërguar në Komisariat për intervistim dhe procedura të mëtejshme.
Ndërkohë, shumë zyrtarë ndërkombëtarë, përfshirë ata nga SHBA-ja dhe Britania e Madhe, kanë kërkuar lirimin pa kushte të tre pjesëtarëve të policisë së Kosovës, të cilët u arrestuan nga forcat serbe të mërkurën.
Policia e Kosovës pretendon se ata janë arrestuar në territorin e Kosovës, ndërsa Beogradi thotë se kanë qenë në territorin e Serbisë. /tesheshi.com/
