Në një ceremoni të veçantë në stadiumin Olimpik të Berlinit, UEFA prezantoi topin zyrtar për Kampionatin Evropian të Futbollit, i cili do të mbahet në Gjermani vitin e ardhshëm.
Topi i adidas do të quhet Fusballliebe (Dashuria për futbollin), ka shkruar UEFA, duke shpjeguar se topi është frymëzuar nga gëzimi i futbollit dhe energjia e turneve në Kontinentin e Vjetër.
Topi është kryesisht i bardhë me skaje të ngjyrosura, pika dhe rrotullime, dhe mbi të janë ilustrimet e stadiumeve që do të presin ndeshjet dhe emrat e qyteteve ku do të luhen ato.
Fussballliebe, siç njoftohet nga UEFA, është topi i parë në kampionatet evropiane me teknologji të integruar për të ndihmuar vendimmarrjen VAR.
“Kampionati Evropian përfaqëson kulmin e garave përfaqësuese në Evropë, prandaj ne jemi të përkushtuar të sigurojmë standardet më të larta të mundshme të cilësisë dhe performancës – nga stadiumi te pajisjet,” tha Zvonimir Boban, drejtori teknik i UEFA-s, kur dorëzoi topin.
Gjermania po pret turneun e parë të madh ndërkombëtar të futbollit që nga Kupa e Botës 2006, e cila në atë kohë shkaktoi një valë të paprecedentë entuziazmi me zona të mëdha tifozësh në të gjithë vendin.
EURO 2024 do të mbahet nga 14 qershori deri më 14 korrik në dhjetë qytete gjermane. Qytetet pritëse janë: Berlini, Këlni, Dortmundi, Dyseldorfi, Frankfurt, Gelsenkirchen, Hamburgu, Lajpcigu, Mynihu dhe Shtutgarti. /tesheshi.com/
