Komisioni për Buxhet dhe Financa pas dështimit për të disatën herë të mbledhjeve dhe vërejtjeve, më në fund arriti të miratojë në parim projektbuxhtin për vitin 2017. Pesë anëtarë të komisionit votuan pro, kurse tre të tjerë kundër. Përveç dy opozitarëve, Shqipe Pantina (VV) dhe Enver Hoti (NISMA), kundër votoi edhe deputeti i PDK-së, Shukri Buja, kurse pro votuan tre deputetët e LDK-së, Naser Osmani, kryetar i komisionit, Besa Gaxheri e Sali Morina, si dhe Safete Hadergjonaj (PDK) dhe Labinota Demi Murtezi (PDK).
Para se të hidhej në votim, deputeti Shukri Buja shprehu pakënaqësinë e tij, për mënyrën se si është ndarë buxheti. Ai i’u drejtua ministrit të Financave, Avdullah Hoti se me buxhetin e parashtruar nuk sheh ndonjë vizion për zhvillim ekonomik dhe për punësim të njerëzve.
Buja ka thënë se buxheti është krejtësisht elektoral dhe përmes saj LDK pretendon të mbajë disa komuna pas zgjedhjeve lokale, që mbahen vitin e ardhshëm.
Ai shtoi se buxheti 2017-ës nuk i përballon dot ligjet që janë aprovuar në Kuvend, ku sipas tij, një prej tyre është mosrespektimi i ligjit për veteranët e luftës.
Ndërsa, kryetari i komisionit, Naser Osmani tha se më datë 20 dhjetor ligji do të dërgohet në Kuvend për shqyrtim dhe miratim./tesheshi.com
