Nga Mensur Krasniqi
Përballja e gjigandëve të futbollit Real – Manchester në Shkup, në finalen e Superkupës, ishte dhe një provë për shtetin dhe politikën maqedonase se si do i qasej raporteve etnike, më gjegjësisht elementit shqiptar. Dhe siç u pa, asgjë nuk ka ndryshuar, edhe me ikjen e atij që konsiderohej promotori i nacionalizmit përjashtues, Nikolla Gruevksi.
Në stadiumin “Filipi II-Arena”, para 1 miliardë shikuesve nga e gjithë bota, Maqedonia u prezantua pa asnjë element shqiptar. E bëri hapur këtë gjë dhe padyshim krejt paturpësisht. Spektakli me elementë folklorikë, ishte vetëm me muzikë tradicionale maqedonase dhe po ashtu me valleve nga ansamblet maqedonase.
Dhe kjo ka bërë që mos mungojë reagimi shqiptar, nga e njëjta fushë, kultura, tradita, folklori.
Janë dy ansamblet më të vjetra dhe më të njohura shqiptare në Maqedoni, “Emin Duraku”, dhe “Ibe Palikuqi”, të cilat e prezantojnë Maqedoninë kudo dhe kurdo në arenën ndëkombëtare. Por ja që në vendin e tyre, ata u injoruan. Ndodhi kjo me shtetin e tyre dhe i cili mbahet në këmbë prej tyre
Sipas kryetarit të ansamblit “Emin Duraku”, Fadil Zeneli, ansamblet shqiptare përfaqësojnë denjësisht shtetin e Maqedonisë nëpër gjitha festivalet ndërkombëtare me flamur dhe shenjat që e simbolizojnë këtë shtet, ndërsa si kundërshpërblim morrën qasjen diskriminuese të organizatorëve të ndeshjes së Superkupës.
“Unë si kryetar i njërës nga ansamblet më të vjetra dhe më të mira të Republikës së Maqedonisë me dëshpërim të madh po pyes: Para se të fillojë ndeshja e Superkupës, me një koreografi të përbashkët kanë luajtur valle katër ansamble maqedonase dhe asnjë ansambël shqiptar. Pse nuk morrëm asnjë ftesë që të jemi pjesë e programit të përbashkët dhe të tregojmë që po ndërtojmë një jetë dhe shtet multietnik? Ndryshe, ne si ansambël shqiptar kudo që shkojmë në festivale ndërkombëtare, e përfaqësojmë Republikën e Maqedonisë me flamur, emër dhe gjitha shenjat e një shteti”, tha Zeneli për tesheshi.com.
Nga ana tjetër, Kenan Jahja, kryetar i ansamblit shqipëtar “Ibe Palikuqi” nuk habitet me qasjen diskriminuese të organizatorëve, pasi sipas tij kjo nuk është hera e parë ku ansamblet shqiptare nuk përfillen, edhe përkundër suksesit të lartë në festivale ndërkombëtare.
“Unë personalisht aspak nuk jam çuditur me këtë veprim të organizatorëve. Kjo nuk është hera e parë që diskriminohet promovimi i kulturës shqiptare. Nuk mund të thuhet që është rastësi, pasi që dje koreografia e vallëzimit ishte e përbërë nga katër ansamble të ndryshme maqedonase, të cilët së paku i kanë bërë 20 prova, dhe në fund paraqitja e tyre ishte shumë e dobët. Është edhe një festival tjetër. ‘Ditët e Kulturës’ ku estrada maqedonase e organizon për çdo vit nëpër qytete të ndryshme të Evropës, dhe asnjëherë nuk ftohen ansamblet shqiptare për pjesëmarrje. Është për keqardhje që ende dominon elementi i diskriminimit nacional të kulturës shqiptare si pjesë përbërëse e këtij shteti. Nëse shikojmë suksesin e ansambleve shqiptare në krahasim me ato maqedonase nëpër festivale ndërkombëtare, gjatë ditës së djeshme duhej të vallëzonin vetëm ansamblet shqiptare. Sidoqoftë, shpresojmë që në një të ardhme të afërt të tejkalohen këto stereotipe dhe të kemi një shtet i cili respekton kulturën e kombeve të ndryshme, e sidomos atë shqiptarë si nacionalitet i dytë për nga përqindja”, tha Jahja për tesheshi.com.
Mbi qasjen diskriminuese të shqiptarëve të Maqedonisë ka reaguar edhe zv/kryeministri për çështje evropiane, Bujar Osmani. Ai në rrjetin social facebook ka kërkuar nga Federata e Futbollit të Maqedonisë të shpjegohet pse organizatorët e programit artistik nuk e shfaqën asnjë element të kombit shqiptaë.
“Ndoqa një ndeshje tamam mes gjigantëve të futbollit evropian. Dëshmuam se mund të organizojmë edhe manifestime të këtij rangu! Ama, organizatorët e programit artistik sikur harruan se Maqedonia është shumëtnike…! FFM të spjegohet!” ka shkruar Osmani. /tesheshi.com/
