Shërbimet e sigurisë amerikane po hetojnë një numër kërcënimesh të bëra ndaj kongresistëve përpara debatit të Senatit për shkarkimin e ish-presidentit amerikan Donald Trump.
Kongresistët janë kërcënuar me vrasje dhe sulme jashtë Kapitolit, raporton AP, referuar një burimi në qeverinë amerikane, i cili kërkoi anonimitet.
Për shkak të këtyre kërcënimeve dhe frikës se protestuesit e armatosur mund të kthehen dhe të hakmerren kundër ndërtesës së Kongresit, policia e Uashingtonit dhe strukturat e tjera federale të sigurisë po kërkojnë që mijëra anëtarë të Gardës Kombëtare të qëndrojnë të vendosur në kryeqytetin e SHBA derisa të përgatitet Senati për vijimin e gjyqit për shkarkimin e ish-Presidentit Trump.
Komanda e Gardës Kombëtare njoftoi se që nga e diela, numri i anëtarëve të saj të vendosur në Uashington ishte më pak se 20 mijë.
U njoftua se shumica, rreth 13,000 prej tyre, do të kthehen në shtëpi në ditët në vijim dhe në javët në vijim, numri i njerëzve do të zvogëlohet rradhazi në rreth 5,000, të cilët do të qëndrojnë në kryeqytetin e SHBA deri në mes të marsit.
Procesi i shkarkimit të ish-Presidentit Donald Trump do të fillojë në Senatin e SHBA më 8 shkurt, tha udhëheqësi i shumicës Chuck Schumer, pasi dhoma e ulët e parlamentit, ajo e Përfaqësuesve, paraqiti zyrtarisht vendimin e saj të hënën.
Schumer theksoi nevojën për të kryer një konfirmim të kabinetit të Biden-it dhe zyrtarëve të tjerë kryesorë të administratës sa më shpejt të jetë e mundur.
Trump akuzohet për nxitje të drejtpërdrejtë të mbështetësve të tij për të pushtuar Kongresin me fjalimin e tij të 6 janarit, në mënyrë që të prishte dhe parandalonte procesin demokratik të konfirmimit nga Kongresi të rezultateve të zgjedhjeve presidenciale në të cilat Joe Biden fitoi dhe Trump humbi.
Javën e kaluar, Trump u bë presidenti i parë në historinë e SHBA që do të gjykohet dy herë.
Ai është gjithashtu presidenti i parë që gjykohet pasi skadon mandati i tij. /tesheshi.com/
