Ndryshe së martës, kur Arsenali humbi ndaj Evertonit, në takimet e një mbrëmjeje më pas nuk ka patur asnjë pikë të lënë nga skuadrat kryesuese të kampionatit anglez.
Takimet e javës së 16-të janë mbyllur me fitore për të tërë pretendentët.
Kështu, Liverpuli e ka marrë lehtë trepikëshin në transfertën ndaj Midëllsbrout. Dy gola nga Lallana dhe një nga Origi i dhanë fitoren 0-3 Liverpulit, të ngjitur në vend të dytë në klasifikim pas humbjes së Arsenalit.
Çelsi fitoi ngushtësisht ndaj Sandërlendit, po në transfertë, duke u shkëputur me gjashtë pikë nga ndjekësit në kryesim, e duke e lënë Sandërlendin në cakun tjetër të klasifikimit, në atë negativin. Goli i vetëm në fitoren 0-1 u shënua nga Fabregas, lojtari i momentit te Çelsi.
Kjo ishte fitorja e dhjetë radhazi në kampionat për skuadrën londineze, që nuk humb prej shtatorit.
Me fitore i mbyllën takimet dhe Mançester Siti e Mançester Junajtedi, edhe pse nuk e patën të lehtë suksesin. Mançester Siti mposhti 2-0 Uotfordin, e Mançester Junajtedi fitoi 1-2 në fushën e Kristëll Pallasit. Ibrahimovic rezultoi vendimtar me golin e tij të minutës së 88-të.
Fitore të pastër arriti Totenhemi, që mundi 3-0 Hall Sitin.
Skuadrat angleze të Premier League-s rikthehen të luajnë në fundjavë, kur do të jetë dhe sfida mes Mançester Sitit dhe Arsenalit. /tesheshi.com/
