Situata e sigurisë në veri të Kosovës është e tensionuar, vlerësoi KFOR-i dhe deklaroi se është i gatshëm të ndërhyjë nëse rrezikohet stabiliteti në Kosovë, në përputhje me mandatin e tij.
Qeveria e Kosovës ka shtyrë për 30 ditë zbatimin e vendimeve për targat dhe dokumentet serbe, pas tensionit në veri të Kosovës dhe bllokimit serb të rrugëve drejt kufirit me Serbinë, raporton Radio Evropa e Lirë (RSE).
Ambasadori amerikan Jeffrey Hovenier është takuar të dielën me presidenten Osmani dhe kryeministrin Kurti, duke i kërkuar dyshes udhëheqëse të Kosovës shtyrjen e zbatimit të këtyre vendimeve, që është dashur të fillojë të hënën, më 1 gusht.
Të dielën, pasi serbët kanë bllokuar rrugët për në pikat kufitare me Serbinë në veri të Kosovës, Jarinje dhe Bërnjak, policia e Kosovës ka njoftuar se në disa vende janë dëgjuar të shtëna dhe disa kanë qenë të drejtuara drejt njësive policore, por nuk ka të lënduar.
Situata e përgjithshme e sigurisë në komunat në veri të Kosovës është e tensionuar, ka vlerësuar misioni i NATO-s në Kosovë, KFOR-i dhe ka deklaruar se është i gatshëm të ndërhyjë nëse rrezikohet stabiliteti në Kosovë, në përputhje me mandatin e tij, raporton RSE. /tesheshi.com/
