Shtetarja më e lartë e Kroacisë, presidentja e vendit, ka vizituar një qendër pritjeje për refugjatët në Gjevgjeli të Maqedonisë, në kufirin juglindor me Greqinë. Kolinda Grabar-Kitaroviç ka qenë e shoqëruar nga homologu maqedonas e slloven, Ivanov dhe Pahor.
Ajo ka kërkuar që BE-ja të zbatojë një politikë të qartë për refugjatët.
“BE-ja duhet të jetë e qartë në politikën e saj ndaj refugjatëve dhe të kujdeset për ata që kanë të drejtën për azil, që po i ikin luftës.”
Ndërsa vendet e Ballkanit janë prekur nga vërshimi i valës së refugjatëve e janë kthyer në rrugëkalimi për ta, presidentja kroate ka kujtuar se, “Vala e refugjatëve nuk do të ndalet vetiu, jo gjersa këto mesazhe të jenë të qarta.”
Mijëra refugjatë gjenden prej javësh në Idomeni, në kufirini greko-maqedonas, për shkak të mbylljes së rrugës ballkanike që të çonte drejt vendeve të zhvilluara europiane. Qindra prej tyre po përpiqen prej ditësh të kalojnë me forcë në anën tjetër të kufirit, teksa policia maqedonase ka përdorur gaz lotsjellës për t’i frenuar.
Presidenti maqedonas do të vinte në pah të drejtën e vendit për të mbrojtur kufirin, duke sqaruar në të njëjtën kohë se revolta e përplasjet ishin rezultat i presionit të refugjatëve për të bërë të mundur rihapjen e rrugës ballkanike. /tesheshi.com/
