Mijëra mbështetës dhe kundërshtarë të presidentes Dilma Rousseff u mblodhën të dielën në rrugët e kryeqytetit të Brazilit dhe në qytete të tjera për të parë drejtpërdrejt votimin në Dhomën e Ulët të Kongresit.
513 ligjvënësve u janë dhënë nga 30 sekonda kohë për të thënë fjalën e tyre përpara se të hedhin votën pro apo kundër procedimit ligjor të presidentes së vendit.
Kundërshtarët e presidentes fituan lehtësisht, ndërsa siguruan 367 vota, diçka më tepër se 342 votat e kërkuara për ta çuar mocionin në Senat.
Dilma Rousseff akuzohet për manipulim të shifrave për të garantuar rizgjedhjen e saj në postin e kreut të shtetit dy vite më parë.
Kërkesa për procedimin ligjor të presidentes së vendit vjen në kohën e recesionit më të keq të Brazilit që nga vitet 1930.
Mocioni do të duhet të kalojë në Senat, diçka që pritet të ngjasë në muajin e ardhshëm, e ku do të vendoset nëse do të ketë një gjyq ndaj presidentes.
Nëse Senati voton për procedimin ligjor, Rousseff do të pezullohet nga detyra, e do të zëvendësohet nga zëvendëspresidenti Michel Temer. Nëse ajo shpallet fajtore, ai do të shërbejë në vend të saj gjer në 2018-ën.
Vetë 68-vjeçarja Dilma Rousseff e ka quajtur gjithçka po ndodh një grusht shteti, duke e akuzuar zëvendësin e saj për tradhti dhe komplot. /tesheshi.com/
