“Sovraniteti i Ukrainës mbi territoret e pushtuara të rajoneve të Donjeckut dhe Luhanskit duhet të rivendoset në 2016-ën,” ka deklaruar Petro Poroshenko në një konferencë shtypi në kryeqytetin e vendit.
Presidenti ka garantuar se këtë vit do të rivihet kontrolli mbi rajonet lindore të Ukrainës, e po ashtu ka shprehur dhe gatishmërinë për të rifituar kontrollin mbi Krimenë.
Mjetet diplomatike, politike dhe ligjore ndërkombëtare janë ato çka do të përdoren për të siguruar rivendosjen e sovranitetit në rajonet që gjenden në duart e separatistëve prorusë.
Mes përparësive, presidenti ka nënvizuar dhe përpjekjet që do të bëhen për të rimarrë kontrollin mbi Krimenë, të aneksuar nga Rusia në marsin e 2014-ës. Për këtë ai ka kërkuar ndihmë nga BE-ja dhe SHBA-të.
Poroshenko i ka mëshuar respektimit të marrëveshjeve të Minskut, “Unë përsëris angazhimin tonë të palëkundur për zbatimin e plotë nga të gjitha palët, pa përjashtim, të të gjitha klauzolave të marrëveshjeve të Minskut. Nuk do të lejojmë asnjë rishikim të marrëveshjeve të Minskut.” /tesheshi.com/
