Petro Poroshenko, presidenti i Ukrainës, ka bërë thirrje për përpjekje globale për të ndalur agresionin rus, ushtarak dhe kibernetik.
“Ka një luftë globale kibernetike të Rusisë kundër tërë botës, ekzistojnë shumë prova. Ky është një rrezik global, dhe bota duhet të jetë bashkë për ta luftuar këtë rrezik,” raporton Reuters të ketë thënë Poroshenko ndërsa merr pjesë në punimet e Forumit Botëror Ekonomik në Davos.
Rusia pretendohet të ketë ndërhyrë në zgjedhjet presidenciale amerikane nëpërmjet sulmeve kibernetike, një akuzë që Moska e ka hedhur poshtë.
Autoritetet ukrainase gjithashtu ia veshin një sulmi kibernetik ndërprerjen e energjisë elektrike në Kiev më 17 e 18 dhjetor, duke lënë të kuptohet se Rusia mund të jetë pas tij.
Poroshenko ka theksuar dhe rëndësinë e NATO-s si një fortesë ndaj kërcënimit rus.
“NATO, përgjithësisht kjo nuk është një çështje parash, është një çështje sigurie. Agresioni rus tregoi edhe një herë se nuk ka sistem tjetër sigurie veç NATO-s që të ishte efektiv për ta ndaluar agresionin.”
Ukraina është në përplasje të hapur me Rusinë për Krimenë, të aneksuar pas një referendumi. /tesheshi.com/
