Edhe një herë tjetër e ka ngritur Erdogani çështjen e Këshillit të Sigurimit të OKB-së dhe të nevojës për rindërtimin e tij, duke e bërë atë më përfaqësues të popujve në botë.
Presidenti i Turqisë ka shfrytëzuar një iftar të shtruar në kompleksin presidencial me pjesëmarrjen e ambasadorëve të huaj në vendin e tij për ta ripërsëritur idenë e vet.
Ai u ka thënë të pranishmëve se nuk është e drejtë që vetëm pesë anëtarë të përhershëm të Këshillit të Sigurimit të kenë fuqi të plotë mbi këtë organ vendimmarrës të OKB-së.
“Këshilli i Sigurimit i OKB-së duhet rindërtuar, sepse vetëm pesë vende marrin vendime mbi fatin e njerëzisë anekënd botës. Kjo është arsyeja pse them, ‘bota është më e madhe se pesë vende’. Ne duhet të garantojmë drejtësi për çdo krijesë njerëzore në botë. Ne nuk mund t’u imponojmë 196 shteteve rreth e qark botës rregulla të vëna nga pesë vende,” ka vënë në pah kreu i shtetit turk.
Erdogani nuk ka harruar të theksojë në këtë kontekst mungesën e përfaqësimit të muslimanëve në këtë organ. “Në tërë botën ka 1.7 miliardë muslimanë, por në Këshillin e Sigurimit të OKB-së nuk ka një vend të vetëm me shumicë muslimanë që t’i përfaqësojë ata. A është kjo e ndershme?”
Këshilli i Sigurimit i OKB-së përbëhet nga pesë anëtarë të përhershëm, SHBA-të, Rusia, Franca, Britania dhe Kina, që kanë të drejtën e vetos dhe mund të bllokojnë çdo rezolutë. /tesheshi.com/
