Erdogani ka shfrytëzuar sërish një pjesëmarrje në një iftar për të shprehur disa prej mendimeve të tij në lidhje me marrëdhëniet mes Turqisë dhe Bashkimit Europian. Ai ka folur për standarde të dyfishta të vendeve europiane, e për qasje islamofobike.
“Politika e standardeve të dyfishta të BE-së ndaj Turqisë është bërë një fakt i pamohueshëm,” ka thënë ai. “Standardet e dyfishta nuk janë më të fshehta. Ata kanë vënë më tepër pengesa në rrugën e Turqisë. E kanë lënë Turqinë për 53 vite të presë në derën e tyre.”
Presidenti turk ka theksuar se vendi i tij i ka dhënë gjithmonë rëndësisë e duhur përshpejtimit të procesit të anëtarësimit në BE, por ka qenë unioni që e ka shtyrë këtë proces. Dhe si shpjegim ai ka dhënë dhe qasjen islamofobike të BE-së.
“Po them tani se qasja e BE-së ndaj Turqisë është islamofobike.”
Ai ka prekur dhe temën e emigrantëve, duke e kritikuar përsëri politikën e BE-së.
“Qasja e keqe humanitare dhe amorale e bllokut të BE-së ndaj emigrantëve ka çuar në një debat serioz mbi besueshmërinë e Bashkimit Europian,” ka nënvizuar Erdogani. /tesheshi.com/
