Presidenti i Kosovës, Hashim Thaçi, ka bërë një deklaratë që vështirë mund se mund ta besojë edhe ai vetë, e lëre më qytetarët e vendit. Thaçi ka shprehur besimin e tij se Spanja, së shpejti do të njohë pavarësinë e Kosovës. Këtë deklaratë Presidenti e ka bërë gjatë një interviste për agjencinë spanjolle të lajmeve EFE, ku nuk ka dashur të tërheqë paralele mes shkëputjes së Kosovës nga Serbia dhe lëvizjeve separatiste në Spanjë.
“E kam vizituar Madridin. Spanja ka njohur dokumentet me të cilat është shpallur pavarësia. Gjithashtu, edhe anëtarësimi i Kosovës në organizata si UEFA e FIFA, është mirëpritur nga të gjithë. Spanja ka duartrokitur dhe përshëndetur paqen e arritur mes Kosovës dhe Serbisë në Bruksel. Spanja nuk është Serbi, e as Katalonia Kosovë”, ka thënë presidenti Thaçi, i cili do të marrë pjesë sot në inaugurimin e projektit të zgjerimit të Kanalit të Panamasë, së bashku me Mbretin e Spanjës, Juan Carlos I, dhe disa presidentë tjerë.
Thaçi ka folur edhe për terrorizmin, duke theksuar se Kosova, sikurse vendet tjera, nuk ka qenë imune për sa i përket pjesëmarrjes së qytetarëve të saj nëpër luftërat në Lindje të Mesme.
“Megjithatë, ne tashmë i kemi marrë masat ligjore për të parandaluar radikalizmin”, ka theksuar presidenti Thaçi në këtë intervistë.
Duke folur për marrëdhëniet e Kosovës me Spanjën, si dhe me administratën e Katalonisë dhe Shtetit Bask, Thaçi tha se “Spanja është shtet mik i Kosovës” duke sqaruar se “institucionet e Kosovës kanë marrëdhëniet të mira me institucionet e Spanjës në Madrid”. /tesheshi.com/
