Presidenti Hashim Thaçi ka takuar sot anëtarët e Këshillit Konsultativ për Komunitete. Në këtë takim Thaçi është zotuar se do të ketë bashkëpunim të plotë me të gjitha komunitetet.
“Kosova është shtëpi e të gjithëve pa dallim etnie. Kemi venë themele të forta e të qëndrueshme, por kemi ende shume punë për të bërë. Hallet tona e synimet tona nuk na ndajnë, por na bashkojnë. Kosova ka ndërtuar shumë mekanizma në të mirë të komuniteteve që jetojnë në Kosovë”, deklaroi Thaçi.
Thaçi më tej foli edhe për parandalimin e migrimit ilegal të komuniteteve.
“Kemi reaguar për të parandaluar migrimin ilegal te komuniteteve, kemi përcjell hartimin e ligjeve për të siguruar dhe respektuar aspiratat e komuniteteve dhe kemi bërë punë të çmuar”, ka thënë ai.
Presidenti theksoi se sot të gjithë qytetarët kanë për qëllim që të kenë një vend pune dhe një shtëpi në të cilët do të jetojnë.
“Askush nuk thotë se Kosova është e përsosur dhe se nuk përballet me sfida, mirëpo nëse punojmë së bashku do të gjejmë zgjidhje për të gjitha ato që na preokupojnë. Kosova është e jona, është atdheu ynë i përbashkët dhe duhet ta zhvillojmë bashkërisht”, theksoi Thaçi./tesheshi.com/
