Më 9 mars, presidenti serb Tomislav Nikoliç, do udhëtojë drejt “mëmës Rusi”, në një vizitë ku pritet të marrë dhe një çmim të Fondit Ndërkombëtar të Unitetit të Popujve Ortodoksë.
Njoftimi u dha nga ambasadori serb në Rusi, Sllavenko Terziç, që tha se Serbia ka planifikuar të rrisë eksportet e produkteve të saj bujqësore në Rusi dhe njëherësh pritet një rritje e investimeve ruse në ekonominë serbe. Por ajo çfarë ishte me rëndësi në deklarimet tij, kishte të bënte me çështjen e nxehtë të përfshirjes së Serbisë në NATO, gjë të cilën ambasadori Terziç e mohoi si mundësi.
“Serbia nuk do të anëtarësohet në NATO. Por nuk ka në plan të bashkohet as me ndonjë aleancë tjetër ushtarake”, tha Terziç. Kjo vizitë e kreut të shtetit serb në Moskë vjen në një kohë delikatem, ku Kremlini po kundërshton fort anëtarësimin e Malit të Zi në NATO, e njëkohësisht po tenton të shtrijë sa më shumë ndikimin e saj në Ballkan, sidomos tashmë që po bie era luftë në Lindjen e Mesme. /tesheshi.com/
