Demarkacioni i Kosovës me Malin e Zi ka marrë mbështetjen amerikan. Marrëveshja u cilësua historike nga ana e presidentit amerikan, Barack Obama gjatë takimit që I ka rezervuar amabsadores së re të Kosovës në Uashington, Vlora Çitaku.
Në një deklaratë të ministrisë së Jashtme të Kosovës për takimin nënvizohen edhe fjalët e presidentit.
“Nënshkrimi i marrëveshjes historike për demarkacionin e kufirit në mes Kosovës dhe Malit të Zi me 26 Gusht, demonstroi edhe më tutje përcaktimin e Kosovës për marrëdhënie të mira fqinjësore dhe vendosmërinë tuaj, që çështjet rajonale të adresohen në frymën e dialogut dhe bashkëpunimit”, ka thënë Obama.
Sipas njoftimit të ministrisë së Jashtme, presidenti amerikan ka nënvizuar se përcaktimi i Kosovës për adresimin e sfidave të tilla në mënyrë të përgjegjshme dhe konstruktive ka vënë Kosovën në një rrugë solide drejt rritjes së stabilitetit, sigurisë dhe prosperitetit në një Evropë të plotë, të lirë dhe në paqe.
“Ka shumë punë në rrugën drejt fuqizimit të demokracisë dhe ekonomisë dhe drejt integrimit në Institucionet rajonale dhe ndërkombëtare. ShBA-të do të vazhdojnë t’ju mbështesin në këto sfida dhe në sfida tjera”, përfundoi Obama. /tesheshi.com/
