Presidenti i Republikës, Bujar Nishani, në një konferencë të jashtëzakonshme për shtyp që nuk e kishte thirrur asnjëherë sa është në krye të shtetit, ka kërkuar nga drejtësia shqiptare të cilët ai e drejton, që të hetojnë dhe gjykojnë për shpifje kreun e bashkisë së Tiranës, Erjon Veliaj.
Nishani ka reaguar ashpër pas akuzave të Veliajt për caktim klientelist të trupës gjykuese në Gjykatën Administrative që do të merrte në shqyrtim çështjen e ndalimit të ndërtimit të një pallati 17-katësh tek diga e liqenit artificial.
Nishani ka përdorur një gjuhë të ashpër ndaj Veliajt, natyrisht duke marrë shkas nga akuzat e kryebashkiakut.
Ndërkaq, kreu i shtetit ka bërë një thirrje të pazakontë: “U kërkoj gjyqtarëve të vendit të mbrojnë Republikën”, por nuk ka specifikuar se çfarë donte të thonte me këtë frazë.
Nishani kundërshtoi akuzat e Veliajt se ka përvetësuar tokën e kishës katolike në Elbasan dhe tha se akuzat janë të rënda nga një autoritet lokal ndaj presidentit të Republikës apo Kryetarit të Shtetit Shqiptar.
Për këtë arsye, ai theksoi se do ta çojë çështjen në Prokurori, e cila duhet të vërtetojë nëse Presidenti është hajdut apo kryebashkiaku shpif.
“Çdo njeri që vjedh ka një emër dhe quhet hajdut. Shteti shqiptar nuk mund të ketë në krye të tij një njeri që është hajdut. Hajduti e ka vendin në qeli. E ka vendin përballë ligjit. Hajduti dënohet sipas ligjeve të shtetit dhe kodeve përkatëse. Kjo është një çështje që nga sot i kalon për shqyrtim drejtësisë.
Drejtësia duhet dhe ka përgjegjësi kushtetuese dhe ligjore, ose të vërtetojë akuzat dhe të identifikojë Presidentin e Republikës si hajdut, ose përdhosësin e shtetit shqiptar përmes shpifjes ta dërgojë përballë ligjit. Kjo është një rrugë pa kthim, pa ndalesë”, tha presidenti në deklaratën për shtyp.
Ndërkaq, protestën e kreut të Bashkisë së Tiranës, presidenti Nishani e cilësoi si aggression ndaj Apelit Administrativ.
“I kërkoj kryeministrit të dënojë sulmin e dhunshëm ndaj gjyqtarëve të Republikës së Shqipërisë. I kërkoj Prokurorit të Përgjithshëm, zyrtarisht dhe publikisht, të hapë dhe të nisë hetimet për dhunën e ushtruar gjatë ditës së djeshme ndaj gjykatës dhe ndaj gjyqtarëve në ushtrim të detyrës dhe për shkak të detyrës. I kërkoj të gjithë gjyqtarëve të ndershëm që të marrin kurajën dhe të mbrojnë Republikën, që është përgjegjësi themelore e institucioneve të pavarura të vendit në një demokraci që funksionon”, tha Nishani. /tesheshi.com/
