Pritjen e funditvitit me gazetarët, presidenti Nishani e ka organizuar pas ndërrimit të viteve.
Aty, kreu i shtetit shqiptar ka folur mbi zhvillimet politike të ditës, duke vënë theksin tek reforma në Drejtësi.
Por ai është treguar hatërmbetur kur ka bërë me dije se nuk është përfilluar fare si institucion për të kontribuuar për këtë reformë.
Presidenti tha se nuk është pyetur fare, nuk i është kërkuar asnjë mendim, ndërkohë që sipas tij kjo lloj reforme kërkon një konsensus sa më të gjerë. Për këtë ai kritikoi mazhorancën qeverisëse.
“Reforma në sistemin e drejtësisë nuk mund të jetë peng e një vullneti. Duhet vullneti i shprehur i të gjithë aktorëve, veçanërisht atyre politikë. Palët të ulen në tryezë për t’i lënë më pas hapësirë dhe kohë ekspertëve që të jetësojnë dakortësimin e tyre”, tha kreu u shtetit shqiptar.
Por Nishani kërkoi të investohet fuqishëm në këtë reform duke shprehur gatishmërinë për të qenë ndërmjetës dhe lehtësues në dialogun mes palëve politike. /tesheshi.com/
