Në zhvillimet më të fundit në Maqedoni, është shtuar dhe zëri i presidentit të Shqipërisë, Bujar Nishani. Në një intervistë dhënë për emisionin “200” të televizionit Alsat-M, kreu i shtetit shqiptar është vënë në krah të faktorit politik shqiptar në shtetin fqinj, duke thënë se interesimi i Tiranës zyrtare për shqiptarët e Maqedonisë nuk mund të quhet ndërhyrje në punët e brendshme, por një interesim ë i natyrshëm pasi paraqet detyrim kushtetues.
“Të drejtat e shqiptarëve, kudo janë detyrim kushtetues i Shqipërisë. Nuk mund të konsiderohet ky interes ndërhyrje në punët e brendshme. Interesimi i Tiranës zyrtare në Maqedoni është i natyrshëm. Shqiptarët janë faktorë vendimtarë në zhvillimin e gjithanshëm të Maqedonisë. Maqedonia ka marrëdhënie të mira bashkëpunuese me Shqipërinë. Kemi interesa të përbashkëta në rajonin që e ndajmë së bashku”, deklaroi presidenti shqiptar Nishani.
Reagimi i Nishanit vjen në një kohë kur politika dhe opinioni maqedonas po e përjetojnë keq bashkimin e faktorit politik shqiptar, i cili ka dalë me një platformë të përbashkët me anë të së cilës kushtëzon hyrjen në koalicion qeverisës, e për këtë arsye kanë akuzuar qeverinë e Tiranës se po ndërhyn në punët e brendshme të Maqedonisë . M.Krasniqi – /tesheshi.com/
Video e intervistës së Nishanit:
