Presidenti Nishani është treguar sa proqeveritar, aq dhe opozitar në një deklaratë të tij të fundit, teksa ka thënë se qeveria duhet të realizojë reformat pasi përndryshe do të përballet me thirrjet për liri dhe demokraci. Ose thënë ndryshe, është treguar sa socialist, aq dhe demokrat.
“Thirrjet e studentëve ‘Liri, Demokraci’ dhe e “E duam Shqipërinë si gjithë Europa’, shprehu dhe përcaktoi ambiciet për demokraci të popullit shqiptar për t’u bërë një vend i zhvilluar i qytetërimit europian. Tranzicioni i historisë konsumon një kohë të rëndësishme për të arritur standardet europiane të të drejtave njerëzore. Shqipëria dhe shqiptarët janë një popull europian në gjen dhe jo vetëm gjeografikisht, por edhe mendërisht, shtetërisht, historikisht dhe kulturalisht dhe herët a vonë nuk ka asnjë dyshim që do të jetë një vend anëtar me të drejta të plota në BE”, ka deklaruar presidenti Nishani.
Gjykuar në kontekstin e qëndrimeve politike, në këtë rast Nishani e ka mbështetur qeverinë Rama në reformat e ndërmara duke e nxitur në realizimin e plotë të tyre, edhe pse forca politike nga ai vjen e që sot është në opozitë, kundërshton fort reformat e ndërmara duke i konsideruar ato si të gabuara dhe me plot pasoja. Por Nishani është treguar “opozitar” në rastin e pjesës së dytë të deklaratës kur ka paralajmëruar një reagim popullor ndaj qeverisë. /tesheshi.com/
