Pas një proteste të ish-të përndjekurve politikë në lidhje me ndërtimin e një bunkeri në afërsi të Bashkisë së Tiranës, diku mes Teatrit Kombëtar dhe Ministrisë së Rendit, kjo çështje rikthehet sërish për debat pasi ëshë vetë presidenti Nishani që i ka dërguar një letër kryebashkiakut Veliaj në lidhje më këtë bunker.
Thuhet ndër të tjera aty: “Në cilësinë e kryetarit të shtetit ju sjell në vëmendje se rijetësimi i simboleve të diktaturës më të egër komuniste të Europës Juglindore dhe e figurave që e ndërtuan dhe e mbajtën gjallë me një dhunë të pashoqe këtë regjim kriminal, jo vetëm që nuk i shërben unitetit kombëtar, por përkundrazi, ngjall revoltën e një shtrese vulnerabël të shoqërisë shqiptare, të cilët kanë vuajtur drejtpërdrejt pasojat më të rënda njerëzore, ende të pashëruara. Në respekt të kujtesës dhe dhimbjes së tyre, por edhe në respekt të të drejtave të njeriut, që populli shqiptar gëzon sot, në vitet e një sistemi të ri demokratik, ju kërkoj që institucioni që ju drejtoni të përmbahet nga çdo veprim që provokon të gjithë ata që vuajtën padrejtësisht dhe që shkon përkundër përqasjes europiane, parimeve dhe vlerave demokratike të botës perëndimore, ku Shqipëria ka zgjedhur të bëhet pjesë”.
Bunkeri që po ndërtohet është konceptuar si një vepër artistiko-muzeale që do shërbejë si hyrje në një tunel të nëndheshëm atomik nga ish-koha e komunizmit. Por siç ndodh rëndom në Shqipëri, politizimi ka qenë i pashmangshëm. Ish-të përndjekurit dhe opozita e kanë quajtur një rikthim provokues të simboleve komuniste, ndërkohë që nuk është reaguar mbi kostot e atij ndërtimi, si dhe mbi faktin e dëmeve të shkaktuara në vendin e ndërtimit, ku si pasojë e një kantieri pune, është dëmtuar rëndë hapësira e re pedonale e inaguruar para pak kohësh. /tesheshi.com/
